Quel che si muove ... a Cesclans. Ricordando Siro Angeli - III

Anche la Società Filologica Friulana, sulla pagina in friulano che periodicamente viene pubblicata dal Messaggero Veneto, si è occupata delle commemorazioni di Siro Angeli che si tengono sabato e domenica prossimi  in occasione del 20° anniversario della scomparsa:

Cjavaç al ricuarde Siro Angeli so grant fi

da: Messaggero Veneto 06 settembre 2011    

J’ sèi dopo tanc’ ans/tornât al gno paîs./I muarz a son lontans/e plui lontans i vîs./Una volta ancia i clas/a vèvin vòus, par me./Cumò il gno cûr si pas/di ce che plui no l’è. Chês puartadis culì a son peraulis di Siro Angeli, l’inteletuâl di Cesclans di Cjavaç (1913-1991) che, come altris cjargnei dal so timp, al à savût meti dongje in forme armoniose elements artistics di nature diferente. Scritôr di oparis teatrâls, autôr di senegjaturis cinematografichis e radiodramis, interessât di cine e teatri ancje in vieste di critic, poete ce par talian ce par furlan, Siro al pant il so inzen fûr dal ordenari fin di fantat: il pas dal Liceu Stellini di Udin ae Scuele Normâl di Pise al è curt. Po dopo, a vegnin Rome, la Rai, il puest di vicediretôr dal tierç program, di cundiretôr dai servizis di prose pe radio e une prove tant che atôr, il Barbe Zef direzût di Vittorio Cottafavi tal film Maria Zef, dificil di dismenteâ, stant la fuarce espressive che e salte fûr di chê interpretazion. 

A vincj agns de muart di chest artist cussì ecletic, il Comun di Cjavaç - dant seont a di un percors tacât dal 2008 cu la sistemazion de sô cjase e cuntune cunvigne di studis - al torne a celebrâ il sô paisan plui innomenât, zontant cumò altris iniziativis. Si che, sabide ai 10 di Setembar, aes 11, li dal Centri di coordenament culturâl de Cjargne (in bande dal Museu Gortani), Ermes Dorigo, Nicola Corbelli e Renzo Balzan a presentaran la ristampe de racuelte di poesiis di Siro che e à par titul L’âga dal Tajament e il volum - autôr il prof. Corbelli - Siro Angeli e il poemetto di una vita “Il grillo della Suburra”. Il libri di Corbelli, te prime part, al passe fûr par fûr la vite di Siro, la produzion teatrâl e liriche, taliane e furlane, des rimis scritis in zoventût fin aes oparis de maturitât; te seconde, al smire l’atenzion sul poemut bon di impegnâ l’artist par plui di trente agns, puartantlu a chel che lui stes al tignive tant che il risultât miôr dal so percors leterari. Tal Centri di coordenament e sarà screade ancje une mostre di scrits origjinâi dal artist, puartâts jù de cjase museu di Cesclans. Domenie lis celebrazions si spostin juste sù lassù: aes cinc daspomisdì, te suaze de plêf di Sant Stiefin, e varà lûc la manifestazion In ricordo di Siro Angeli. A tiessi i ricuarts a saran pardabon in tancj di lôr, scomençant di chei di famee. Po dopo: la Compagnie teatrâl Siro Angeli, Gilberto Ganzer, Grazia Levi, il Grup corâl Sot la Nape, Luigi Maieron. La Filologjiche no à volût mancjâ a chest apontament impuartant, clamant a contâ di Siro Gianfranco Ellero, so grant amì, e Gloria Angeli. Cun di plui, al fasarà di moderadôr il nestri conseîr Celestino Vezzi.