Un manifest ribalton pai furlans di vuê

Federico Rossi nus scrîf dai Colonos:

Mandi Amîs,

grazie pa la segnalazion dal Manifest dai Furlans

(let ai Colonos il 5 di març in ocasion da la "Balade pal 1511") sul vuestri impuartant blog.

Us mandìn il test integrâl.

Auguris di bune batae. Mandi

Federico

MANIFEST RIBALTON PAL POPUL FURLAN!

Furlans di dut il mont, SVEAISI! Al è un un fantasime ch'al zire ator pal Friul, un cjalçut dal sjum ch’a ti à fat indurmidì. Ma chiste volte i grignei di chê di Peonis a son propit pericolôs: a si clamin INDIFERENSE, EGOISIM, VUARBETÂT DI PENSEIR, METERIALISIM, OPORTUNISIM.

Visaisi che la cjoche dal pan a è dure di smaltîle. Dulà vino lassade la nestre vere anime contadine, che sclete misure dal timp che nus veve insegnât il “nuie di masse” come la pui impuartante leç morâl da la nestre vite? La miserie di fan no nus veve mai impedît di tignî simpri libar un puest, su la taule vueite, pal puar pui puar di nô, ch’al vignive a tucâ su la nestre puarte!

Dulà la vino butade la nestre dignitât di emigrâts, cumò ch’i sin parons a cjase nestre e i cjalìn cun voi di disgust e di pore chei altris migrants dal dì di vuè, ch’a zirin pa lis stradis dal Friûl, piturâts di disperade sperance?!

Il furlan al è deventât siôr, cagon, masse passût, e ce tant beo e pote! Nol voul vê fastidis di sorte. Al lasse ch’a sedin chei altris a decidi tal so puest, a sielzi la strade pui comude, la pui furbe, che no è mai la pui juste. I baste in cambi la braure di une biele machine, magari grandonone e di lusso, un SUV par fâ cualchi chilometro di strade ogni dì e gjoldisi le partide da l’Udinês di domenie.

Provait a cjalâsi ator: il mont al è rivât fin dentri dal nestri ort: OGM, velens, porcariis di ogni sorte, cence nacuarzisi di nuje! S’al ven un cancar, no son bêçs par fâ la TAC, i nestris fiis a scugnin puartâsi di cjase la cjarte dal cesso, parcè che la scuele no pos permetisi nancje chê. No fasìn pui fiis par pôre di no podê permetisi un “tenore di vita adeguato”. E tu? Tu sês deventât vecjo cence la sapiense che i tie vecjos ti vevin insegnât. Bruntulon, razist, mai content. Tu saressis dongje a tirâ il sghiret se ta lis scuelis furlanis a no fossin i fiis dal mont, furlans gnufs, piturâs di neri, di zâl, di ros. Un “arc di San Marc” par une gnove primevere da la Patrie. Piçui furlans ch’a fevelin furlan-rus, furlan-cinês, furlan-magrebin, furlan-african.

Furlans di dut il mont, SVEAISI! A è ore di ribelâsi!. FASIN ANCJE NÔ UN RIBALTON DAL NUMAR UN! No sintîso il tambûr dal riviel ch’al bat ancje pal Friûl? In chiste ore ribaltone i sin achì par tocjâ il vuestri cour: par butâ vie la part malade e fâ sflorî une gnove sperance pal Friûl e pal Mont di doman!