Il moment di alçâ il cjâf

Riceviamo e pubblichiamo // J cjapìn e j metìn in rêt.


Cjârs amîs, tal indoman da granda manifestazion di Tumieç dulà che passe trei mil personas a àn puartât in plaça las cuestions dal eletrodot di Pittini e Fantoni, da l’âga di bevi, e dal progjet di Edipower, mi sint in dovei di ringraziâ i curadôrs di chest blog . In gracie des informazions puntuâls, claras e scletas, che volta par volta a son vignudas fûr su Alesso & Dintorni i letôrs di chest blog a àn podût capî che chest al era il moment di alçâ il cjâf e di domandâ a plena bocja rispiet: rispiet pa nestra dignitât di popul e rispiet pai lûcs dulà che i sin a stâ. A Tumieç, passa trei mil personas a àn det no al sassinament dal lâc. A Tumieç, passa trei mil personas a àn mostrât di jessi cuintra il mût di fâ di Carniacque, domandant invessit la libertât di podei tornâ a la gjestion comunâl dai acuedots. 
A Tumieç passa trei mil personas, dutuna cui autriacs dal cjanâl da Gail e i lôr Sindics a àn det di no a l’ elettrodot Wurmlach-Somplât proponût di Pittini e Fantoni. Ma jenfrivie a son vignudas fûr ancje atras cuestions, palesadas dai sindics cjargnei (no ai viodût chei di Cjavàç e di Vergegnas) che a son montâts sul palc dai oratôrs doma par stâ cidins, par protestâ cuintra la mancjança di autonomia, di libertât e di democrazia. E un dai tancj cartei puartâts dai manifestants al veva propit indiment la democrazia. Al era scrit: Democrazia e Lavôr tal rispiet dal Ambient. 
                                                                        Remo Brunetti