Il podestà Albino Coidessa e l'autonomie dal nesti comun
Il 1928, chenti, nol è stât dome l’an dal prin taramot dal vincjesim secul. Ma ancje l’an là che il comun di Cjavàç al a riscjât di jessi cancelât.L’idèe i vignì al On. Di Caporiacco, pressident da “Federazione Friulana degli Enti Autarchici”, forsit soflât dai sorestants di Tumieç. L’obietîf di cheste pensade al ere chel di creâ un gnûf comun metint insieme Cesclans, Mena e Somplât, cun Tarnep e Dales, par sfrutâ miôr la economie turistiche dal lâc, lassant po Cjavàç al comun di Tumieç. Il progjet dut câs nol lè in puart pe fuarte oposizion dal podestà d’inchevolte, Albino Coidessa, che cun l’aprovazion di dutis lis frazions, al fasè fûc e flamis par difindi il so comun. A son passâts i agns, ma la tentazion da part di tancj sorestants forescj di considerâ il nestri teritori come une braide a disposizion dai lôrs desideris a è simpri stade fuarte. Par esempli,stant dome a ce che si è savût, tun prin moment, si veve pensât a Cjavàç pes gnovis presons di Tumieç, e il COSINT al veve proponût di fâ te nestre campagne un aereopuart lunc 2 km. Par fortune chestis propuestis a vevin cjatât subit un no clâr e convint seti da part des aministrazion comunâls, che de popolazion. Parcè che se di une bande al è just colaborâ tra comuns di cà e di là da l’âga, come che si è fat par esempli cu la costruzion dal puint di Davons che chest an ch’al ven al fâs 100 agns, di chealtre bande a son principis tanche le autonomie comunâl e la tutele dal so teritori , dulà che nol è nancjûe di metisi a discuti.
Al dì di vuei,magaricussìno, la nestre autonomie comunâl a sta lant al mancul. Par esempli, a ‘nd’è aministradôrs che invessit di batisi par tornâ a vei la gjestion comunâl sui acuedots e la depurazion des aghis, a spessèin a dâ su dut a Carniacque, che però a domande ai citadins boletis che a son plui dal dopli di ce che a pajavin te gjestion comunâl. Cun di plui, il passàç cun Carniacque al a compuartât une pierdite secje pes cassis comunâls. Difat, i nestris implants, fats dopo dal taramot, no vevin dibisugne di spindi trop in manutenzion, dimût che dut ce che al vignive incassât al restave al comun pes sôs dibisugnis. E par fâ un’altri esempli, ancje l’idèe di metisi cu la Concje Tumiecine a sta ridusint, an dopo an, la nestre autonomie comunâl. Plan planin, a Tumieç si infuartìssin la direzion e l’aparât burocratric, e ta chei altris comuns a càlin servizis e personâl.Il vice sindic Brunetti Vito al a domandât plui voltis di fâ un pôs di conts par viodi se a è e dulà che a è la convenience pal nestri comun. Dibant. Tal municipi di Cjavàç a lavorin ormai dome une o dôs personis, cui citadins che a fàsin simpri plui fadie a capî che al sucêt lì dentri. E no par colpe lôr, ma semplicementi par ce che no esist une informazion che fasi di leam tra aministradôrs e citadins, che anzit, cuant che a van a domandâ alc, ur pos sucedi ancje di cjatâ cualchidun cu la lune par traviers, e di vegnî maltratâts. E in chest brut clima a cres la distanze tra aministradôrs e aministrâts, a cres la malaplanta da indiference, e a va al mancul la democrazie, bielzà minade cun la elezion direta dai sindics, che a imponin vuei la lôr volontât a conseîrs comunâi dispes ancje lôr disinformâts.Vè alore che al covente tornâ a dai un significât a la democrazie, e a la partecipazion popolâr te vite des istituzions. Vè alore che al covente che lis decisions, almancul chês impuartantis pe vite dai nestris paîs, a setin cjapadis dopo sintût la popolazion, no prin. Alore sì che i citadins di Somplât, Mena Cesclans e Cjavàç a cjaparessin su chê cussience e chê braure che a dan un sens al nestri stâ insieme dentri dal stes comun. Ma lant indavant cussì, ancje se vuei ‘o stin forsit unevôre miôr che tal 1928, stant almancul a di une confidenze che mi a fat l’assessôr Gianni Borghi la dì dal Corpus Domini, tra cinc agns i nestris paîs a deventaran ducj frazions di Tumieç.
Stin in vuaite, alore, paisans, parcè che se a fos pardabon cussì ‘o pierdaressin chê autonomie comunâl, che par difindile tancj sindics e podestàs a àn impegnât lis lôrs miôrs energjiis. Ma stait in vuaite ancje vualtris cjârs aministradôrs. Cun dut il rispiet che a merite la vuestre incariche, ricuardaisi che lis decisions che ‘o cjapàis, a saràn ricuardadis par simpri.
Remo Brunetti
