Inmò su la visite dal Pape

Su la discussion leade a visita dal Pape che al rive vuê in Friûl, un contribût di Remo Brunetti:

Pape Benedet 16° tra Acuilèe e Vigneisie

Si conte che tor  dai agns ‘90, i industriâi e banchîrs venits si erin inecuarts di jessi deventâts la potence economiche di chest cjanton di Italie. Si erin però ancje inecuarts che a Rome a contavin pouc o nuje. Cussì ur vignì la idèe di ingrandî la lôr dimension, tornant a doprâ une peraule inventade ai timps di Mussolini, e che a ere lade in dismentie. Ven a stai il Triveneto. La politiche si metè subit in vôre, prospetant une gnove aleance tra lis  regjons Sud Tirôl-Trentin, Venit, e Friûl-Vignesie-Julie. Stiçâts dai lôr politics ancje i vescui venits si movèrin, screant daurman la Conference dai Vescui dal Trivenit. Dai e dai i fats dal Trivenit a scomençarin a comparî tes primis pagjinis dai gjornâi plui impuartants da Republiche. Ma a rompi i ûs a fòrin i sorestants dal Tirôl di miesdì e dal Trentin, che nasant che chest progjet ju vares puartâts a jessi dominâts di Vigneisie, a preferìrin gjavâsi-fûr e pensâ invessit a di une sorte di euroregjon cul Tirôl austriac, par lôr plui conveniente. I banchîrs e industriâi venits a scuignìrin alore ripensâ i lôr progjets. La gnove entitât si podeve fâle su dome cun Venit e Friûl-V.J, cussì però al vignìve fûr dome un Bivenit! Alore dal moment che a fevelâ di Trivenit a erin restâts ormai dome i vescui e chei des previsions dal timp, e che Bivenit no ur someave, a pensàrin di doprâ un tiermin geografic, e al nassè cussì il Nordest. “Ma che si clami trivenit, bivenit o nordest, daûr a è simpri la volontât di domini dai sorestants venits.” Si podeve lei in chê volte sui gjornâi trentins.

In tancj si son impensâts di chestis peraulis cuant che àn let sui gjornâi la presentazion da visite dal Pape, fate dal Gardenâl e Vescul di Vigneisie, Bons. Scola, par cont dai cussì clamâts vescui dal nordest. No si a podût fâ di mancul di ricuardâ che cuant che Pape Woityla al veve visitade la nestre regjon, invidât dai vescui di chenti, si ere fermât dibot cuatri dîs. Là che Pape Ratzingher, invidât dai vescui dal nordest, si fermarà chenti dome dôs oris, par po lâ a Vigneisie dulà che al finirà la serade e là che al passarà, tal doman, une zornade intierie. Intindinsi, chenti, pal plui a son contents che il pape al vegni in Friûl, ancje se a tancj nol  plâs chest massedament tra Vigneisie e Acuilèe. Al è come massedâ il vueli cul vin: no stan insieme. Acuilèe a ven prin di Vigneisie, e lis lôr storiis religjosis, liturgjichis, e istituzionâls a son difarentis. Ma distes, ancje se al ven dome par une grampade di minûts,  benvignût a pape Benedet! ‘O sin contents che al vegni a confermânus te fede dai nestris vons. Ma ‘o spietin ancje che al vegni a confermâ, ricognossi e esaudî i nestris dirits di oms e di feminis che a vìvin chì in Friûl. A son dirits che a stan criçant. La pratiche da democrazie, il dirit al lavôr e il dirits dal ambient a son metûts in forsit da le aviditât di potentâts pronts pal profit ancje a ruvinânus la esistence. Ma a son ancje altris dirits che a riguardin i oms e lis feminis di cheste regjon, ven a stai i dirits lenghistics des comunitâts slovene, todescje e furlane. Chestis comunitâts a domandin rispiet e serietât. A domandin une tutele vere  des lôr lenghis,-no pro forme o par dispiet-, in dutis lis istituzions. Par chel che al rivuarde nô furlans, ‘o sin stâts ricognossûts da Republiche taliane tanche minorance lenghistiche storiche, cu la leç 482 dal 1999. Tal 2001 il furlan al è stât ricognossût dal Vatican tanche lenghe liturgjiche..Tal 2007 la regjon Friûl-V.J. e a fat la leç 29 pe promozion e tutele dal furlan. Par chel che al rivuarde l’ûs liturgjic, la C.E.I. che a  autorizât la stampe de Bibie e dal Lezionari, cumò no vûl autorizâ la stampe dal Messâl Roman Furlan cu la scuse che a scuen spietâ che al vegni fûr prin chel talian. ‘O spietin ancje che si tornin a stampâ i cjants e lis liturgjiis acuileiêsis che a partègnin a cheste nestre gleisie.

Pape Benedet, i dirits lenghistics dal popul furlan a son stâts ricognossûts tant dal Stât che da Gleisie. Ma par colpe di sorestants codârs, cun o cence colet, la tutele dal furlan a cjate, tant tai palaz dal podei civîl che ta chel glesiastic, ancjemò tantis puartis sieradis. Poben, Pape Benedet, judinus a butâ jù chestis puartis!

REMO BRUNETTI