Dibattito sul lago: il parere di prè Gjulio

Il nesti lâc a riscjo

Dal 1975 chei che a fasevin la autostrada a vevin stabilît di fâ doi plaçai di area di servizi inta campagna dongja dal lâc: miârs di metros cuadrâts. Duta la int a à lotât, tignût dûr, ocupada la nesta cjera , fint che il President da Regjon, Toni Comel, al è vegnût di persona a fermâ il progjet. E cumò, magari sterps e baraçs, ma, inveza di un planâli di peton e di catram, j vin la nesta cjera.
Cumò a ulin ruvinânus il lâc. Cun pompas cu la bocja granda como una galarìa, a intindin di zupânus su l'aga dal lâc fint intal lâc di Verzegnas. Ma parcè? Par cjapâ beçs, par ve pui aga che a ven ju a movi las turbinas da centrâl e par vendi la corint che a fasin. Cu la nesta aga, cul nesti lâc, lôr a àn di deventâ siorons. A disin che il nivel da l'aga al cressarà e al calarà nomo di un metro in dì (il lâ e il tornâ al sarès ogni dì), ma
1) e se lôr a fasin calâ il lac di doi, di tre, di cuatri o cinc metros, cui ju ferma?
2) E cuant che ches bocjatas di pompas a zupin l'aga, a tirin su il paltan che, in tancj agns, dopo il disastro da centrâl da Sade, a si è ingrumât metros e metros sul font dal lâc. Alora al deventa duta una malta di paltan, e cuant che l'aga paltanada a torna ju di Verzegnas, ce devential il nesti lac?
3) Metìn, al ven un an di sec, como ch'al è capitât tantas voltas; il lâc a si sbassa. Lôr a zupin simpri l'aga che a ur coventa e alora ce devential il nesti lâc? Una poça di paltan, par simpri.
E dut e nomo par che lôr a cjapin beçs, beçons, ansit, a disin chei che a si intindin unavora pui di me.
E pai lôr beçs nô j vin di viodi a murî il nesti lâc.
Int di Delès, j no ài mai fat il predi fra di vuâtis par intares. E alora crodeitmi: no stait a lassâsi tirâ ator das tabajadas da l'Azienda Edipower che a ûl meti inmò di pui las mans sul nesti lâc. A contin nomo balas, parcè che a fasin par intarès! E cuant che i grancj a fasin par intarès, a scjafoin la cosiença, la justizia e la int.
Tal grant e tal piçul, il beç al è carogna, e al deventa il diu dal mont.
Intant il Comun al à dî a la int clâr se al à aprovât il progjet, se al saveva ce che al aprovava e s'al intint di comedâ las rôbas.
Fasìn di dut par chest disastro che a nus ruvina la pui biela roba che j vin a Delès a nol deventi!
Mandi
Pre Gjulio plevan
(di 37 agns di Delès)

(da: Dalès, un timp par vivi, luglio 2010)