Dibattito sul Lago: il parere di "Ladins dal Friûl"

Lât di Cjavaç: pe Edipower al sarès in regule!

Cjavaç - Il dopleament de centrâl idroeletriche Edipower di Somplât di Cjavaç nol presente aspiets di incompatibilitât ambientâl, anzit, ducj i studis e lis ricercjis fatis inte fase denant la presentazion dal iter par otignî chest dopleament a àn dât di viodi che il progjet al è compatibil cul ambient: a dî dut chest e je, naturalmentri, la stesse Edipower che il mês di Dicembar stât in doi incuintris publics davuelts a Cjavaç e Verzegnis e à tornât a confermâ lis sôs posizions. I incuintris a jerin stâts organizâts dai sindics dai doi comuns plui diretementri interessâts dal progjet, o sei Iuri e Sulli. Inmò lis cunvignis a àn viodût la partecipazion dal diretôr dai progjets di Edipower, Giuseppe Monteforte, dal responsabil idroeletric Roberto Gianatti, dal maiorent pe provincie di Udin de societât, Salvatore Marchese e dal professôr Gabriele Borsani docent di Ecologjie al Politecnic di Milan. Cuintri part a jerin i rapresentants de Legheambient regjonâl Zorç Cavallo e Marc Lepre.

O ricuardìn, par chei cence memorie, che la Edipower e je une societât privade pe produzion e distribuzion di energjie a control di capitai soredut lombarts, che a un ciert pont e à comprât lis centrâl idroeletrichis de Cjargne dal Enel, che prime lis veve compradis de Sade, che par realizâlis e veve in pratiche savoltât l’ambient de vals cjargnelis, cence che chenti no si rivàs a otignî dibot nuie: al è evident che ce che al tire il B.I.M. a son dome cagneris, vadì caritât pelose. Al ven di domandâsi parcè chescj implants no ju à comprâts la nestre Regjon, come che la Provincie autonome di Bolzan/Bozen e à comprât i implants dismetûts dal Enel, cun vantaç concrets pes industriis, pal artesanât e pal cumierç dal Sud Tirôl. Cussì almancul daspò i dams o varessin cuistât cualchi vantaç: e invezit nuie. Anzit, a vuelin jemplânus ancje di eletrodots par ogni dontri.

Chescj a son fats e no cjacaris di ostarie! Che cumò la Edipower e intindi completâ la opare di sfrutament des risorsis idrichis de mont furlane, al è naturâl, al è tal ordin di compuartament di une sane societât privade che e cîr di incressi il so patrimoni e i siei vuadagns. Che lôr a vegnin a contânus che nol cambie nuie e che dut al è compatibil e in regule al è ancje tant normâl. E sarès biele che nus contassin il contrari. Ma intant il lât di Cjavaç al è simpri plui in agunie, e chel di Verzegnis nol po nancje jessi plui clamât lât co si è ridot a une poce che e cambie continuementri di livel. A disin che si varà cualchi “contropartita”. Po ancje stai che e sedi vere. Ma po stai ancje che e vadi a finîle come la liende de Sade-Enel. E chestis “contropartite” bastarano a fâ front ae pierdite di imagjine che dal pont di viste turistic si varà di paiâ? Restant sul concret: cetancj gnûfs puescj di lavôr puartaraial in Cjargne chest dopleament de centrâl?

Dut câs la sensazion che si à su la piel e je chê che il sfrutament colonialist dal ambient e des risorsis naturâls cjargnelis al è cetant dûr di murî! Magari cussì no! (red).

(da: http://www.ladinsdalfriul.eu/ n. 1, zenâr 2010 )