Lago, l'opinione di ... Ladins dal Friûl

L'ultimo numero della rivista "Ladins dal Friûl" (il n. 1 del gennaio 2012) torna ad occuparsi della "questione Lago", analizzando il significato della proposta di indizione del  referendum e offrendo la traduzione "in marilenghe" della lettera inviata da Steven Ariis ai giornali (già pubblicata anche sul Blog).

Il lât di Cjavaç e... chel di Bled
E va dilunc la bataie cuintri il dopleament de centrâl di Somplât

Trasâgas - Si è sierade a cuote 660 la racolte di firmis promovude a Trasâgas dal grup di minorance "In Comun" par domandâ che l'ent locâl al inmanei un referendum che al permeti ae popolazion di pandi la propie opinion in rivuart al dopleament de centrâl idroeletriche di Somplât, progjetade de Edipower. La richieste di referendum, cu la prionte des firmis, e je stade protocolade e cumò la aministrazion comunâl e varà 30 dîs di timp par decidi sul ce fâ. Cualchidun al à za vût cûr di dî che la richieste e je fûr dal vade, co il probleme nol è di competence esclusive dal comun di Trasâgas. Se un tant al fos vêr, nuie al impedìs istès al sindic di sintî, democratichementri, cuale che je la opinion de sô int suntune opare che e puartarà dams di no pôc cont al ambient. Vâl a dî che a beneficis incierts (compensazion), a corispuindin dams evidents: dopleâ la centrâl al vûl dî alçâ il nivel de aghe di ben 2,5 metris, secont un professionist che al à vude la incarghe dal comun di studiâ il probleme, dome di un metri secont Edipower. O 1 o 2,5 metris al reste il fat che lis spuindis dal lât a vignaressin alteradis in maniere significative, con conseguencis negativis pe faune e pe flore, comprometint cussì ogni progjet di svilup turistic de Val dal Lât.
    Al merte inmò memoreât che la Val dal Lât e à bielzà paiât un presit unevore alt aes grandis oparis, baste ricuardâ il passaç, devastant, de autostrade e di un oleodot, che a àn compuartât dome siervitûts cence nissun vantaç pal chel che al intent la creazion di puescj di lavôr.
    Simpri sun chest cantin, o publichin culì sot vie un intervent di Steven Ariis, di Raviei, vignût fûr di resint suntun gjornâl di chenti. La traduzion dal test par furlan e je stade curade de redazion. (red.)
 
     O ai let cetant inderedât lis resintis declarazion di cierts sindics de Val dal Lât sul cont dal dopleament de centrâl idroeletriche di Somplât. Prin di dut no rivi a capî cemût che un sindic, rapresentant di une interie comunitât, al puedi fevelâ e cjapâ decisions a non di ducj, come se un ben grandon tant che il Lât di Cjavaç al fos une propietât sô se no fintremai de Edipower.
    No pensi propi che lis sôs declarazions a rispietin il pinsîr de int che lu à votât. I ten a sotliniât che no soi un ambientalist e o consideri in fats ciertis oparis necessariis pal svilup de Cjargne. Par esempli, jessint di Raviei, o critichi il fat che si vebi sielzût di oponisi ae realizazion di une gjave di zes, che e varès produsût cualchi dam ambientâl, ma dut câs acetabil se si cjalave ai beneficis che une tâl opare e varès puartât, a partî dai puescj di lavôr. E po la zone dulà che si sarès intervignûts, no veve nissune valence turistiche considerât che vuê e je inmò lassade tal abandon plui totâl…
    O soi favorevul ancje al progjet pai implants schi di pas di Pramuel (Pontebe), necessari secont il gno pensâ a fâ tornâ a partî la economie di une valade che e je daûr a murî, ma o soi assoludementri contrari al progjet Edipower sul Lât di Cjavaç.
    Un lât naturâl al è un don che la nature e à fat al om, e biel che in dute la Europe i lâts a vegnin tutelâts e a riclamin miârs di turiscj, achì si è decidût di fiscâ l'unic spieli di aghe naturâl de Cjargne. Clarementri cu la za esistint centrâl il lât al è bielzà comprometût, co la presince dal pes e je scuasit dal dut disparide cul versament di centenârs di metris cubis di aghe glaçade, cence contâ che a ogni montane il lât al ven jemplât di paltan.
    Ma ae Edipower (e prime di jê ae Sade-Enel n.d.r.) no i baste di vêlu ruvinât, e nol baste di vê lassats cence un fîl di aghe i riui de Cjargne (comprendût il Tiliment, che une volte si veve pensât di fâ meti dentri, 
tant che ben naturâl preseôs, tal patrimoni Unesco) cun presis di aghe e centralinis, cumò cheste societât e vûl distruzilu dal dut. Par chest mi inderede sintî i rapresentants dai citadins pronunziâ frasis come cheste: "No 'nd i sarà nissun dam ambientâl". Mi inderede une vore parcè che cuntun minim di resonament, cualsisei al po rivâ a capî ce conseguencis che une opare di cheste sorte, o sei il dopleament de centrâl di cumò, e podarès vê suntun ecosisteme cussì delicât come che al è chel di un lât.
    In Cjargne lu àn capît ducj, e la int e je finalmentri stufe di fâsi meti il pît sul cuel, e di gloti e tasê. Dut câs chel che mi met aduès plui marum, e mi fâs vignî i sgrisui, al è cuant che cierts sindics, e cierts "brâfs" rapresentants de nestre Regjon autonome, e justifichin chestis oparis fevelant di "compensazions": ce aie mai puartat di positîf la centrâl di Somplât che o vin cumò? Si isal forsit cjatât la fate al dispopolament de chestis valadis, che a van inmò dilunc a pierdi 200/300 abitants ad an? La Cjargne ise forsit une regjon ricje graciis a dutis lis centralinis che a son stadis realizadis par ogni dontri su riui e flums? O forsit jerial miôr fâ cont soredut sul turisim? Magari cumò a 'nd jere cualchi puest di lavôr in plui rispiet aes pocjis personis che a lavorin pe Edipower.
    O vorès aduncje invidâ i sindics che a son favorevui al dopleament de centrâl di Somplât a lâ a fâ un zîr a pene di là dal confin, in Austrie o in Slovenie, par viodi cemût che il turisim che al diven di un lat, ancje piçul, al rivi a puartâ vantaçs, benstâ e lavôr a une interie regjon. Citadinis come Bled in Slovenie, a fondin la lôr economie juste apont su la presince di un lât, e sincerementri, confrontâ cheste realtât cun chê di paîs come Cjavaç, Somplât, Trasâgas e Bordan, a burissin dentri di me un sintiment di vergogne.
                                                                     (Steven Ariis)

Ladins dal Friûl n. 1, pag.5 - Zenâr 2012                                                                      www.ladinsdalfriul.eu