Como vuê. 68 anni fa, lo sfollamento

La strada che dalla piazza della Roja porta all'uscita del paese l'hanno chiamata "Via otto ottobre", per lasciare un ricordo indelebile  di quella triste giornata del 1944, quando la gente di Alesso venne fatta sfollare per lasciare le proprie case agli occupanti cosacchi.

Per ricordare (e far conoscere a chi non lo sa) quei lontani fatti, riproponiamo una ricostruzione uscita sul "Boletìn di Dalès".

(...) Il comant todesc al veva dât dongja in Friûl un trop di « specialisti anti guerriglia », int organizada nomo par chel, ben armada e soradut ben comandada. Chest grop, fra avost e setembre, al à fat dut un pestacuesim di chês bandas di Attimis e Nimis, brusant dut ce che a cjatavin e dopo, cui prins di otobre, a an girât la lôr atenzion da nesta banda, cul risultât che ducj si sa. Intant, tas campagnas di Glamona e di Usôf a erin rivâts i mongui : and’era tancj, e a davin fastidi a caporions fassiscj gosârs. Cussì a devin jessi stâts contents, cuant che i todescs a an mandât i cosacs dilà dal Tajament, dulà che Delès al sarès deventât « Novocerkassk ».
E cussì, dopo da bataja cui partigjans, par deûr dai todescs e dai fassiscj, tor il 5 di otobre, a son rivâts i cosacs, cui lôr cjars e tancj cjavai, plens di fan (via par Glamona, prima, a n’al è che a la vessin tant comuda, ju conossìn i gosârs ; cavìa i taulâts a erin plens di fen e ator pas monts a erin medas e medii).
Cuant che a son rivâts, a si son accampâts aì das scuelas, tai prats da Roja e jà, scuasi fint lajù dal tai. La puritât da int a è partida la domenia 8, ma zà che doi-trei dîs prima a patulgjavin il paîs, par sielgi la cjasa che a ur plaseva di pui. 

E la int di Delès, spezia las pôras feminas,  a vevin il cuel che al vegniva simpri pui sglonf di disperazion. E la int a à scognût lâ via, passâ il Tajament e lâ a cerî ospitalitât di ogni banda jù pal Friûl, opûr lâ tai stalis in mont o su, tal comun di Cjavaç. 
I mongui a erin brâfs di lâ  a cjaval, ma di campagna e agricultura zero. Difat la int, sicomo che a vevin nomo vignas di clinto e di bacò, che al madurava in setembre, e duncja che il vin al era benzà pront intas damigjanas, a an fat a la svelta a esaurî las scortas. Ma las patatas, che a erin sot cjera, bisugnava forcjâ e pleâ la schena par cjapalas su : difat a son restadas dutas o scuasi intas cunvierias e ta vierta dal ’45, cuant che ormai a la vevin capida ancja lôr che a lava pa curta, a lassavin a la int sfolada che a vegnis a samenâ, e cussì a son vegnudas fûr las cartufulas. In chei mês prima a na lassavin passâ nissun pal paîs : al era un mongul clamat « Cjandin » pa sô « bontât » che al fermava ducj. Tal insiema, però, a erin pui disgraciâts di nô ! E cussì a passavin i mês, lant a vôra inta « Todt » o provant, ogni tant, a tornâ in paîs.
La int a spietava dì par dì che al finis dut, par podê tornâ tal paîs e lôr, i cosacs, dislidrisâts da lôr cjera, cenza sperança, a vedevin dì par dì la fin che a si svizinava. Difat, dopo vê cjapât la scopula dal 26 di avrîl e scjampâts via pa not cidins cidins, vê fassât i scalçs dai cjavai e las rovedas dai cjars, cjapât la strada di Mont di Crôs e da Val dal Gail, in fuarça dai acordos tra inglês e rus, che a volevin puartaju in Siberia, in tancj a an sielt la Drava como « ultima residenza ». Piês di cussì a na podeva lâ a finî par lôr.
Par nô, alc di miôr : j podevin almancul jodi il soreli che al jevava di chê banda di Tarnep !
Cussì la int a è tornada dongja, dopo siet mês di sfolament : ce tancj tons che a son stâts sbarâts su la rosta dal Palar, cuant che al è stât il prin aniversari dal 8 di otobre, par fâ fiesta, par dî che a era finida ! E la storia di chei dîs a deventava zà lienda, cun Bepo da Roissa che a si meteva a cjantâ, par riguardâ a chei che a la vevin vivuda, e par fâ savê a chei che a na erin, i moments dal passâc dal Tajament : « E il Tagliamento sfollava a piene grave… ».

Zuan Cucchiaro

(da: « E il Tagliamento sfolava in piene grave ». Ricuart dai 60 agns dal sfolament dal ’44, in "Dalès un timp par vivi" n. 43, 2004

Una cjanta sul sfolament

E sui dîs dal sfolament, Maria da Tina e Menia Boz a ricuardin di una cjanzon che a vevin inventât i dalessans e che a si cjantava su l’aria di « E’ primavera, svegliatevi bambine… » :

 E l’8 ottobre, 
sfollati gli alessani, 
repubblicani, 
cosacchi insieme 
a saccheggiar.
Giovanni Picco 
fece di tutto 
per non sfollare, 
ma coi fascisti, 
niente da far !
E a tarda sera, 
fioriscono gli amori, 
coi bimotori 
a bombardare, 
la gran città.

(Ibidem)