Une recension dal libri "Storiis, liendis e tradizions de Val dal Lâc".

Il Diari (che cumò si lu cjatilu dome online - www.ildiari.eu) al à publicât pôc timp indaûr une recension dal libri di Velia Stefanutti Storiis, liendis e tradizions de Val dal Lâc

-------------

Storiis, liendis e tradizions de Val dal Lâc

Viaç tes tradizions popolârs de Val dai Trê Comuns, par cure di Velia Stefanutti

A pene presentât il libri Storiis, liendis e tradizions de Val dal Lâc, par cure di Velia Stefanutti. Il libri, che al puarte indevant la golaine Agâr de Filologjiche, al met adun vincj contis curtis, risultât de memorie des gjenerazions passadis e de ricercje storiche puartade indenant da l’autore e si insede te suaze classiche des tradizions popolârs, ma cuntune atenzion particolâr pe varietât locâl di Tarnèp e lis sôs peraulis plui vieris e tipichis, valorizadis in gracie di sclariments e notis a pît di pagjine.

Lis liendis plui innomenadis, salvadis dal poç de storie dai paîs di cheste Val, a deventin cussì ocasion par fermâ te cjarte il flum de memorie orâl e rinfuarcî la coesion coletive ator di tradizions, nons e usancis di une volte che la premure de vite moderne e riscje di parâ jù e di fâ pierdi.

La racuelte e je insiorade di imagjinis vignudis di archivis privâts dal puest e dal comun di Bordan, che miôr a pandin i aspiets materiâi de vite umile e gjenuine dai timps passâts, disveâts no tant par nostalgjie ma par podê lassâ in ereditât a lis gnovis gjenerazions la ricjece di une storie e di une identitât.

Lis resons di cheste opare a son duncje fedelis a lis peraulis spindudis di Feo Mizzau, tant che President de Societât Filologjiche Furlane, te ocasion dal 64^m Congrès, tal volum dal 1987 dedeât a la Val dal Lâc: «Chel passât al è dentri di nô e si pant mediant le lenghe. […] O fevelìn di radîs, no di fueis. E di radis ch’a si piardin ta la gnot dai timps e ch’a son vivarôsis, ch’e àn tignût salt l’arbul aes bissabovis di îr e che ancje uê no molin piz ai gnûfs barbars».