Cuant che prè Checo al vegniva a Dalès e a Vasinas....

A son 25 agns che al è muart prè Checo, predi furlan, predi furlanist. Al è il câs di riguardâlu ancje a Dalès e a Vasinas, se no ati parcè che propit di un pôcjas di sôs cjacaradas su la storia dal Friûl tegnudas "di là da l'aga", dopo dal taramot, al è vegnût fûr intal 1990 il libri “La nestre storie”, pas edizions da Associazion “Storie dai Longobars” , .

Un profîl di prè Checo gjavât de edizion furlane di wikipedia: 

Pre Checo Placerean (Francesco Placereani) (Montenârs 30 di Novembar 1920 - Udin18 di Novembar 1986) al fo un predi, insegnant e grant furlanist.

Dopo la preparazion tal seminari di Cjastelîrs e di Udin al devente predi ai 9 di Lui dal1944; te sierade al partìs par Rome dulà che al studie te universitât Gregoriane. Intal1948 al va in Argjentine, dulà che al insegne morâl tal seminari di Rosario. Daspò jessi tornât in Friûl al deventâ un dai plui impuartants furlaniscj de glesie furlane. Famôs pe so oratorie e pe grande capacitât di gafâ e strissinâ lis plateis.

Cun pre Toni Beline al fo il prin a voltâ la Biblie par furlan, presentade ai 22 di Jugn dal1984. Za tal 1958 al veve tacât a voltâ il vanzeli par furlan dal grêc antîc.

Intal 1962 al fo un dai fondadôrs di "Int Furlane" e intal 1966 dal "Moviment Friûl". Al fo fra i ispiradôrs de "Mozion dal clericât pal svilup sociâl dal Friûl" tal 1966, che e fo firmade di 529 predis furlans e po sconfessade dal vescul. Al fo il cjâf ricognossût di Glesie furlane e membri dal comitât pe Universitât furlane. Al à voltât par furlan il messâl roman, publicâts in version complete tal 1977.

Atent ae disgrazie de emigrazion, intal 1974 al invie la fieste dal popul furlan strenfât (magari cussì no) pal mont, che si fasarà ogni an la prime domenie di Setembar, a Einsiedeln in Svuizare.

Intal 1976 ancje pre Checo come tancj furlan al ven colpît dal taramot, e scomence ancje par lui la vite te tendis. Ai 11 di Lui di chel an al celebre une grande messe a Acuilee, cûr de glesie furlane, memoreant i muarts e sburtant i vîfs a tirâsi fûr cun iniziativis come chê pe istituzion de Universitât dal Friûl. Une altre messe famose sarà chê dal an dopo, simpri a Acuilee, par ricuardâ i 900 agns dal Patriarcjât.

Intal 1980 al scomence a jessi simpri plui batût di une malatie de circolazion, che planc a planc lu puartarà a murì ai 18 di Novembar dal1986, a dome 66 agns.

(http://fur.wikipedia.org/wiki/Checo_Placerean)