"Alesso e dintorni", dal puint di Braulins al puint di Avons

"Alesso e dintorni", dal puint di Braulins al puint di Avons

lunedì 5 gennaio 2015

E la luce fu .... nei paesi della Valle del Lago

Sull'ultimo numero del Bollettino di Cavazzo "Il nestri paîs", uscito a fine dicembre, è pubblicata una interessante ricerca di Remo Brunetti dedicata alla storia della elettrificazione dei nostri paesi. Col consenso dell'autore, pubblichiamo anche sul Blog la ricerca, con alcuni elementi aggiuntivi rispetto alla edizione cartacea. Come sempre, chi ha informazioni o documenti capaci di integrare il già  esauriente quadro esposto, può  inviarli al Blog per la pubblicazione. (A&D)
----------------
Cemût che a è rivade la lûs eletriche tai nestris paîs.

Cuant che vie pal atom, il soreli al piert planchin planchin la sô fuarce… Cuant che lis oris scuris a son plui di chês claris, vè alore che nus baste, in gracie da energjie eletriche, fracant un boton, vei lusôr e fuarce in dutis lis stanzis des nestris cjasis. Ma nol è simpri stât cussì. Difat  fint ai prins agns dal secul passât, in tantis cjasis dai nestris paîs, si veve lusôr dome in gracie di ferârs a cjandelis, lampions a petroli o lampadis che a fasevin lusôr cul gas dal“carburo”. Lâ ator vie pe gnot pes stradis dai nestris paîs a vuleve dî, se no ere la lune, vei a ce fâ cul scûr plui font. Ma ancje se il scûr da gnot nol  spaventave i nestris vons, che a làvin in file, cul ferâr, di une cjase in chê altre,  tal 1865 il comun di Cesclans al refudà la ufierte di meti su, pe inluminazion publiche i fanâi che Udin al veve dismetût. Mutivant cheste sielte pal fat che vie pa gnot, par Cesclans, nol ere chel trafic che al justificas la spese. Ma i timps a stàvin cambiant. 
Tai ultims agns dal 1800, Udin, in gracie di Arturo Malignani, a deventà la tierce citât in Europe, dopo Londre e Milan, a vei la inluminazion eletriche e, tal 1908 a deventà une des primis citâts a vei il tram eletric. I cjargnei, dut câs, no durmìvin. Tal 1901, dai emigrants puseòts tornâts da Romanie, a metèrin su la prime centralute eletriche a Pusèe di Verzegnis. Simpri in chel an Giovanni Venier, a Enemonç al met in vore ancje lui une turbine. A dâ la lûs a Dimpeç invessit al è Nigris, un impresari edil. Vignint in ju  a è la Ditta Mazzolini di  Darte che a furnis di energjie eletriche lis frazions di Tumieç poiadis su pe rive gjestre da Bût, sfrutant i salts da roia di Cjanive dulà che al  ere ancje un implant di proprietât di un cert Rinaldi. Luigi Gressani al sfrute un salt da roia te zone nort di Tumieç che i bute 60 cjavai dinamics, che zontâts a la fuarce di une machine a vapôr di 40 HP, i permètin di furnî energjie al paîs. Vie pe gnot, a la rêt di inluminazion publiche e privade, e vie pal dì ai implants industriâi. In chei agns, in Cjargne, a nasserin altris implants, come la “Gortana” che a dave la eletricitât ai paîs dal cjanâl di Guart. E po a Comeliàns, a Rigulât, a For Davuatri ,  a Sudri, a Darte…Tal 1911 a Paluce a nassè la SECAB,  une cooperative che al dì di vuei te alte val da Bût a è parone di 5.500 contadôrs e che a furnìs energjie eletriche al 50% dal presi di Enel. Un grant esempli par ducj i comuns cjargnei…
Tal 1910, la Società Elettrica del Barmàn di Resiùte che a veve una centrâl in comun di Resie, vulint slungjâ lis sôs liniis fint a Damâr e a Tumieç, a domandà al nestri comun di podei meti su une gnove linee ancje di Damâr a Cjavàç. Ma il comun di Cjavàç al veve bielzà viert un debit par finanziâ la sô  part pe costruzion dal puint di Davons (1913)e nol intindeve fant altris. Tal imprin, la vuere dal 1915 no fermà il cressi da reit eletriche. Difat tal 1916,  la Società Elettrica del Barmàn a vignì  comprade e cjapade dentri te Società Friulana di Elettricità metude su tal 1906 a Udin, propit di Arturo Malignani. Ma la invasion austriache dal 1917 a fermà tancj progjets, e ancje se a la fin dal 1918 la vuere a finì, a coventàrin un pôs di agns par ripiâsi. Ancjemò no si cognos la date precise di cuant che a vignì fate la vore. Secont Vito Brunetti dopo dal 1924. Ma la linèe eletriche che a puartà la corint colegant Damâr cul nestri comun a vignì  metude su propit di cheste societât . Ma no erin chei grancj lusôrs, e no in dutis lis cjasis. Tal imprin, la SFE a furnive curint a forfait ancje dome cun dos lampadinis par cjase. 
A Cjavàç, tal 1927, si lei  tun contrat, la Società Friulana  di Elettricità a furnive a Puppini Elisabetta 150 watts di corint par 5 lampadinis  di 25 cjandelis ognidune, a di une tension di 125 volts, e al presi di 1.20 liris al kwh.  A Cesclans, a conte  Ida Borghi,  la lûs eletriche a rivà tor dal 1932 e a Mena,  Renzo Barazzutti le a viodude tal 1933;la trifase invessit a rivà tal 1942. Po, secont Michieli Lorenzo   la corint a rivà a Somplât  tor dal 1938, e a  Dalès, al dîs Pieri Stefanutti, tor dal 1925. A Bordan e Tarnep la SFE a inaugurà i siei implants ai 10 di Zenâr dal 1931. Ai 14-9-1947 al vignì inaugurât l’implant eletric dal”Albergo al Lago”. Vè ce che si podeve lei sul “Gazzettino” tal indoman:
"La signora Gina Magini, gentile madrina cui i sindaci dei tre comuni di Bordano, Cavazzo Carnico e Trasaghis hanno offerto un ricco mazzo di tuberose, ha innestato la corrente e per la prima volta da che mondo è mondo la luce s'è sparsa sotto i pioppi, o lecci, i castagni dell'angolo del lago che era al centro della festa e dove domani sorgerà una spiaggia, degli alberghi e tante altre belle cose fatte per le domeniche felici e per i periodi di meritato riposo . " 
Stant a di un document da SFE, tal 1960  la tension di 125 volts a ven rimplaçade cun chê di 220 volts. E in cualchi cjase, là che a son machinaris, a ven furnide ancje la tension di 380 volts. Ma la  SFE, che a rivà a jessi parone di 500.000 contadôrs,  tal 1960 a faseve bielzà part da SADE. Dut câs, tal 1962 cui socialiscj al podei a vignì fate la nazionalizazion da energjie eletriche e al nassè l’Enel che si ocupave sei di produzion che di distribuzion di corint. Cun la ricostruzion dai nestris paîs dopo dai taramots dal 1976 a è stade ricostruide ancje  la rêt eletriche  .
 Vuei, la distribuzion da energjie eletriche a ven organizade in mût che la corint a puedi rivâ di plui direzions. ‘O vin lis liniis di alte tension di 132kvolts che a coleghin Tumieç cun la centrâl di Dimpeç e cun chê di Somplât, ma  ancje Tumieç cun Scluse…Da centrâl di Somplât a partissin altris liniis: la Somplât-Buje , la Somplât –Pordenon-Scorzè di 220kv, e la Somplât- San Denêl di 132kv. A Tumieç (e cussì ancje a Buje)al è un implant che al trasforme la alte tension in media tension, ven a stai di 132kv a 20 kv.  Di chest implant, in prionte des liniis a BT e Mt pal comun, a partissin cuatri liniis: une che  va su a Verzegnis, une che  va a Cjargne, une che  va a Damâr e une clamade “Alesso”, che , passant par lì dai Scarsins, nus puarte la corint a nô. Ma prin che a rivi tes nestris cjasis,cheste corint,  bisugne trasformale di media tension in basse tension, ven a stai mudâle di 20kv(20.000 volts) in 380 volts e 220 volts. Par chest a esistin i trasformadôrs su pâi o dentri di cabinis in muradure. 
I trasformadôrs su pâi si cjatiju , a Cjavàç,  un in Val, un lì dal Cjamp di Balon, un in via Della Barca, e un dapît di via San Rocco. A Cjavàç a son  dos cabinis in muradure, une lì dal PEEP di Vila, e chealtre dongje lis scuelis. A Cesclans  si  cjate une cabine jentrant tal paîs, e  in Navalascia al è un trasformadôr su pâl.  Mena a è furnide di trei cabinis di trasformazion : une lì dal cimiteri, une lì da galerie de autostrade, e chealtre lunc la strade tra Mena e Somplât.  A Somplât, une cabine si cjatile lì dal “Villaggio Enel”, e une lunc il muraion da centrâl. A Cjavàç, par vei une sigurece in plui su pe continuitât da furnidure di energjie eletriche, cumò al è in costruzion un “bay –pass” che al vares di colegâ la cabine des scuelis cun chê dal PEEP par po colegâsi cun la linèe che a ven ca di Tumieç. Al è impressionant viodi ce sorte di organizazion che a covente par permetinus di impiâ une lûs o di inviâ un motôr eletric. Ai provât a contâlu, judât di ducj i amîs che mi an dât lis informazions che a coventavin par meti ju chest articul. 

E rivât dapît ‘o scuen ringraziâ Zanetti Giordano, Franco  e Danilo Michelli,  Sandro e Vito Brunetti , Pieri Stefanutti, Roberto Cella e la sô famèe, la siore Ida Borghi, Michieli Lorenzo, Renzo e Franceschino Barazzutti e ducj chei che mi an judât a capî cemût che a è rivade la lûs eletriche tai nestris paîs.

                                                             Remo Brunetti

2 commenti:

  1. Simpri a proposit di lûs eletriche, Renzo Barazzutti di Mena, nomenât tal articul mi a contât ancje che inmò prin dal 1915 la sô famèe a veve la lûs eletriche in cjase. A vevin metût su une turbinute sun tun riu che al vignive ju di Divil. Cheste turbine a cjamave dôs bataiis. Intant che une a dave lusôr in cjase, chealtre la metèvin a cjamâ. La farie di Renzo Barazutti a è stade la prime chenti a costruî dinamos che a dàvin la lûs ai fanâi des machinis e des bicicletis, che inchevolte a dopravin ancjemò fanâi a carburo.

    RispondiElimina
  2. Ocjo: a è saltade une "r" tal coment di Remo e cussì invessit di lei batariis si lei bataiis.

    RispondiElimina

Ogni opinione espressa attraverso il commento agli articoli è unicamente quella del suo autore, che conseguentemente si assume ogni responsabilità civile, penale e amministrativa derivante dalla pubblicazione sul Blog "Alesso e Dintorni" del testo inviato.
OGNI COMMENTO, ANCHE NELLA CATEGORIA ANONIMO;, DEVE ESSERE FIRMATO IN CALCE, ALTRIMENTI NON SARà PUBBLICATO.
Grazie.