"Alesso e dintorni", dal puint di Braulins al puint di Avons

"Alesso e dintorni", dal puint di Braulins al puint di Avons

sabato 2 marzo 2013

Un manifesto per la montagna friulana (4)


La rivista "Ladins dal Friûl" nel numero di marzo, appena uscito, dedica una pagina al documento diffuso dai Comitati "La mont mari dal mont", contenente l'illustrazione di una serie di proposte utili al miglioramento delle condizioni di vita in montagna. Il documento si sofferma in particolare sulle implicanze legate al previsto raddoppio della centrale di Somplago e alla realizzazione dell'elettrodotto Wurmlach- Somplago.  Un articolato commento "par furlan" è firmato dal direttore di "Ladins dal Friûl"  Renzo Balzan.

La mont mari dal mont
Riflessions suntun document dal Coordenament dai Comitâts de mont furlane

“La mont, mari dal mont” al scriveve pre Toni Beline su La Patrie dal Friûl, e lu faseve par denunziâ il stât di abandon e di emargjinazion de mont furlane, che al cognosseve benon vint vivût, fat il mestri e il plevan par plusôrs agns a Treli, Rualp e Val, tal Cjanâl dal Incjaroi. Chest sproc vuê al è stât ripiât dal Coordenament dai Comitâts de mont furlane, e lu àn metût come titul a un document dulà che par cierts aspiet a vegnin ripiadis lis resons des batais di pre Antoni, cuintri il “palaç” i politics e cuintri i sorestants che a prometin tant ma che po mantegnin pôc, se no dibot nuie. Lis conseguencis a son un dispopolament simpri plui inreversibil, degrât dal teritori, ûs des risorsis puartât indenant in maniere coloniâls, pierdite di ogni sorte di autonomie, come che e da di viodi la vicende de Comunitât di Mont, pierdite di servizis come uficis di pueste, scuelis, Tribunâl di Tumieç.
Sun chest cont, come che si à vût iniment denant trat, il Coordenament dai Comitâts de mont al à prontât un document in plui ponts, che a van a tocjâ ducj i aspiets de “cuestion montagne”. Si scomence cul argoment aghe, o sei dal so sfrutament par produsi energjie. Achì e je in piis la cuestion dal progjet par sfrutâ in dopli lis aghis dal lât di Cjavaç de bande de societât privade Edipower spa, che a so timp e à cuistât dal Enel i implants idroeletrics de Cjargne. Cuintri chest progjet si batin i Comitâts, par salvâ il lât plui grant de regjon, e parcè che di dutis chestis manovris lis comunitâts de mont furlane no àn mai tirât nissun vantaç ma dome dams ambientâi.
A chest probleme il document al zonte un probleme che, par plui aspiet, al è colegât, o sei la proponude realizazion dal eletrodot Würmlach-Somblât. Ancje achì dams ambientâi marcâts cence cuistâ in cambi nissun vantaç. Se si ten cont che l’ambient al è aspiet plui significant par une cualificade ufierte turistiche, cheste storie dal eletrodot e je verementri fûr dal vade. E po no
si viôt parcè che chel eletrodot alì no si pues fâlu passâ sot tiere, come che a so timp al è stât fat passâ sot tiere l’oleodot de Siot, che al travierse, zonte fûr, dute la Cjargne par po lâ sù in Austrie e in Bavarie.
Sul cont de mobilitât, e simpri in rivuart ae tutele dal ambient, il document al conteste il progjet pe realizazion di une autostrade di colegament tra A23 e A2, o sei il colegament tra il Cjadovri (Plan di Vedoia) e la autostrade Udin Tarvis, tal svincul di Damâr. In chest câs a sei fiscade e sarès la Val Taiament. Miôr inalore doprâ chei bêçs par miorâ, e meti in sigurece, la viabilitât bielzà presint, che in plui ponts e palese problemis a pene che al tache a plovi, o a neveâ, plui dal normâl.
Agriculture, selviculture, filiere dal len: par chescj ponts il document al met in evidence la situazion di crisi che a son daûr a traviersâ, e lis pussibilitâts che indi podaressin divignî metint in vore politichis diviersis.
L’esempli sun chest cont si lu cjate intes Provinciis autonomis di Trent e di Bolzan, che a son di mont tant che la Cjargne e la Val Cjanâl, dulà che la agriculture e je sostignude e incentivade, ancje parcè che un ambient curât (dai contadins) al zove une vore al turisim.
Sul cont dal lavôr e de ocupazion, si osserve che il tiessût industriâl de mont al presente un pocjis di realtâts
significants come lis cjarteris di Tumieç, Davâr e di Mueç, e, tal setôr metalmecanic, la Automotive Lighting (ex Seima) di Tumieç e la fabriche di cjadenis di Fusinis.
Chestis aziendis a son lis jonis de ocupazion dal comprensori, ancje in relazion al indot che lis interesse. Inmò, si à une presince di aziendis industriâls e artesanâls minôrs, a voltis a conduzion familiâr, che a operin in diviers setôrs. La presince po de CoopCa cu la direzion e i supermarcjâts e ofrìs un bon nivel ocupazionâl tal setôr dal cumierç. Cun dute la situazion crisi lis cjarteris e la Automotive Lighting a tegnin. Lis dificoltâts ocupazionâls si àn invezit intes aziendis plui piçulis e artesanâls, in particolâr chês colegadis al setôr edîl, aes costruzions in gjenar e al lôr indot. In soference al è ancje il cumierç, sevi intai centris maiôrs di Tumieç e Tarvis, sevi intai paîs plui piçui. In rivuart significatîf al è che e sedi stade butade jù la Agemont (Agjenzie pal svilup de mont), creade a so timp de Regjon par proponi progjets e par cjapâ soluzions ai problemis des aziendis de mont. Tant a dî che fâ e disfâ al è dut un lavorâ, ma aes fin si spindin risorsis (publichis) e no si viodin lusôrs.
Une atenzion particolâr il document lu risierve, e nol podeve sei diferent, al ambient, che nol po sei considerât un strument di produzion e, par conseguence une font di redit da sfrutâ cence regulis. Al va tutelât e gjestît come cu va, a traviers un ûs razionâl di dutis lis risorsis che al dispon. Culì si coleghe par fuarce l’argoment des propietâts coletivis, che no son un vanzum dal passât, ma che a stan cuistant une funzion atuâl e di prospetive inte misure dulà che la societât post industriâl, cuntune popolazion mondiâl vie vie cressint, e va dant simpri plui atenzion a la tiere, uniche base alimentâr che o vin.
Lis propietâts coletivis a son une tradizion de nestre regjon, e de mont in particolâr, ma de bande des istituzions no stan cjatant nissun sostegn, anzit si sta fintremai cirint di butâlis jù. Cheste, naturalmentri, e je pure arogance e pôc rispiet pe storie, pe tradizion, pe autonomie de int che e aspire a gjestîsi di bessole.
Ultins ponts tocjâts a son chei de scuele, de culture e dal dispopolament. Trê aspiets leâts tra di lôr. Plui istruzion al vûl dî plui culture, e plui culture al vûl dî plui capacitât di capî e di cjatâ soluzions ai problemis.
Scuele e culture a puedin ancje fermâ il dispopolament, creant (inventant) gnovis ocasions di lavôr, in maniere autonome e in armonie cul ambient. Cheste e podarès sei la vere “rivoluzion culturâl de mont” par rivâ a cambiâ lis tindincis in at tal comprensori. Naturalmentri cun personis gnovis, e magari zovinis, buinis di meti in vore politichis gnovis. “La mont, mari dal mont”, la filosofie popolâr di pre Antoni Beline e je simpri di atualitât. (renzo balzan)
(Ladins dal Friûl pag.2 - Març 2013)

1 commento:

  1. Uffa!! Chescj comitâts ce lungje che le fasin, e po dopo dut ancje scrite in furlan. A iere senzati plui interesant il sondagjo sul arbul in plaçe. Paulin

    RispondiElimina

Ogni opinione espressa attraverso il commento agli articoli è unicamente quella del suo autore, che conseguentemente si assume ogni responsabilità civile, penale e amministrativa derivante dalla pubblicazione sul Blog "Alesso e Dintorni" del testo inviato.
OGNI COMMENTO, ANCHE NELLA CATEGORIA ANONIMO;, DEVE ESSERE FIRMATO IN CALCE, ALTRIMENTI NON SARà PUBBLICATO.
Grazie.