Elettrodotto per Somplago: "no si lu fâs plui e fertic"

Sul numero di "Ladins dal Friul" appena uscito, una riflessione della rivista, a firma Renzo Balzan,  sugli ultimi sviluppi della questione dell'elettrodotto Wurmlach - Somplago:

Eletrodot Würmlach-Somblât: disìn graziis a Viene
Ma i Comitâts di difese teritoriâl de Cjargne a invidin a restâ in vuaite

Sul progjet dal eletrodot Würmlach-Somblât e semee rivade la sentence definitive: no si lu fâs plui e fertic. Une sentence che no je rivade ni di Triest e nancje di Rome, ma di Viene. Sun chest cont bielzà il mês di Setembar stât il tribunâl aministratîf federâl austriac al veve dineade la
autorizazion al iter de opare, judicantle no compatibil cul teritori che e varès traviersât, une valade che di Kötschach-Mautnen che e va jù viers misdì sul confin cu la Cjargne, il cussì clamât “Kronhofgraben”, considerât un sît di alt valôr naturalistic, candidât par chest a jentrâ a fâ part dal Patrimoni de umanitât tutelât dal Unesco e za fasin part des centis ambientâls tuteladis dal protocol “Nature 2000”.
Partint di chestis premessis il mês di Avrîl stât si è vignûts a savê che chê sentence e je stade
confermade ancje dal Consei di Stât di Viene, cuntun proviodiments che al puarte la date dai 24
di Fevrâr, ma che al è stât rindût public juste apont ae fin dal mês di Avrîl. Naturalmentri, la
competence teritoriâl di chest suprem ordin jurisdizionâl al à valence dome pal teritori austriac,
ma al evident che, no podint realizâ i 42 chilometris di eletrodot proviodûts sul teritori
carintian, e ven a colâ ancje chê part di progjet che e varès vût di traviersâ la Cjargne, dilunc il Cjanâl di San Pieri fint a Somblât. E ven sù dut câs l’ostie a savê che invezit il Ministeri dal Ambient di Rome al veve dât un parê positîf in rivuart ae valutazion di impat ambientâl di cheste opare, cuntun proviodiment publicât fintremai su la Gazete Uficiâl.
La decision dal mês di Setembar stât dal tribunâl aministratîf austriac e jere stade acolzude cun maravee e insoference dai promotôrs dal eletrodot (la Alpe-Adria Energjie di Udin), parcè che daspò la decision positive dal Ministeri talian dal Ambient, e soredut daspò la cjapade di posizion favorevul de Union Europeane, ducj a jerin aromai rassegnâts a scugnî gloti cheste gnove injustizie.
In fats tal Istât di an passât la Ue e veve vût cûr di meti dentri cheste opare tal elenc intai progjets
“di interès comunitari”, une condizion che e varès permetût ae Alpe-Adria Energjie di podê aurî ai
finanziaments europeans, di rindi plui curient l’iter des proceduris des autorizazions e di otignî, se al
coventave, daurman il dispropi dai terens dulà che e veve di passâ la opare. Ma, cemût che o vin
sclarît denant trat, il tribunâl aministratîf austriac al veve palesade une divierse opinion. Cuintri chê
sentence la societât proponint e veve presentât ricors al Consei di Stât di Viene, che al à invezit
confermade ad in plen la decision cjapade inte prime sentence, respinzint cussì il ricors.
Nol covente discori che chest esist de “vicende eletrodot” al è stât acolzût cun solêf dai Comitâts
che in chescj agns in Cjargne si son batûts cuintri cheste opare, che e varès disfigurât un patrimoni
ambientâl tra i plui biei de interie Regjon. E lu àn fat cuintri dut e cuintri ducj, cuintri la politiche ma chest sot sot e à simpri sostignût la realizazion dal eletrodot, se no no si rivarès a capî il parcè di
chel parê positîf de bande di Rome. No sin cussì barbezuans di no rivâ a capî ciertis trabossignis.
Juste il Coordenament dai Comitâts di difese teritoriâl de Cjargne sun chest cont al à burît fûr
un comunicât dulà che al ven sotliniât che: “Ae cjapade di posizion dal Coordenament dai Comitâts
de Cjargne sul eletrodot Würmlach-Somblât, sul cuâl la resinte sentence dal Consei di Stât di Viene
e à metût un “verboten” definitîf par chel che al inten la trate carintiane, e à rispuindût la president
de Zonte regjonâl Debora Serrachiani. E lu à fat in maniere publiche cun declarazions ae stampe
sclarint che, di une bande, lis resintis decisions austriachis di proibî la costruzion di fat a slaifin
cualsisei pussibile realizazion de nestre bande, e di chê altre, visant che l’assessore Vito e à vût la
incarghe di fâ dai pas in rivuart alì dai competents ministeris di Rome”.
Declarazions che a son stadis preseadis, ma, a insistin inmò i Comitâts: “Che i ministeris di Rome
a vessin tornadis a vierzi lis proceduris pe realizazion de trate in Cjargne in presince di une
prime sentence negative in Austrie e tal moment che al jere daûr a pronunziâsi il Consei di Stât di
Viene, nus àn metût in vuaite, ma soredut nus puartin a difidâ dai tananais in vore intai ministeris
di venti jù”.
In sumis la sentence di Viene e je di une impuartance tâl che e varès di conseâ la presidente
Serracchiani, che e je ancje la influent vice presidente nazionâl dal Partît Democratic, oltri che
responsabil par chest partît pes infrastruturis – e l’eletrodot e je une infrastruture – a meti cheste
decision austriache no intes mans dai ministeriâi romans, ma in chês dal so amì prin ministri Renzi parcè che al sieri une volte par dutis, e par simpri, cheste vicende suntun progjet privât che, cemût che e à vût cûr di ricognossi la stesse Serrachiani, al presente “cetantis problematichis”.
Il comunicât dai Comitâts al rive in fin insom disint che: “Chest a dovaressin domandâ ancje i sindics cjargnei ae president Serracchiani. No voressin che, al di là dal ricors al president de republiche, aes gjenerichis declarazions sul eletrodot come “jo o soi contrari” al vebi di sucedi ce che al è bielzà sucedût chenti sul cont de vicende dal tribunâl, dulà che ducj a jerin contraris ae sô sierade, ma ae fin lis cjossis a son ladis a finîle verementri mâl! Une cjosse e je il dî, une altre il fâ. Juste apont tra il dî e il fâ al è tal mieç il mâr!”.
In conclusion o scugnìn jessi cetant agrâts a Viene e ae Justizie austriache se no, al sarès stât
impreteribil, nus varessin tornâts a tibiât une altre volte. Altri che leçs e progjets a sostegn de mont.
Cuant si svearaie la int? Cuant cjaparaie cussience di ce che al è daûr a sucedi intes nestris valadis,
gjestidis come che a son in maniere coloniâl?
(renzo balzan)

sito di riferimento: http://ladinsdalfriul.blogspot.it