Une recension de "Il Diari" dal libri su Dalés e Voncèdas

Dalès, storie dai cencestorie

Presentât a Dalès il libri “Alesso e Oncedis: la storia, i gruppi familiari” di Pieri Stefanutti e Decio Tomat.Il volum, editât dal Comun di Trasaghis cul Centri di Documentazion sul Teritori, al presente intes sôs 296 pagjinis, studis e une vore di imagjins storichis e di grups di famee tiradis dongje cu la colaborazion de int.

Il libri al è stât stampât de Designgraf di Basandiele cul contribût de Regjon Friûl - VJ, dal B.I.M. e de Comunitât di Mont di Glemone, Cjanâl dal Fier e Valcjanâl. La publicazion si vierç cul salût dal Sindic di Trasaghis Augusto Picco che al elenche lis diviersis publicazions bielzà dadis fûr su lis
frazions dal Comun (su Vasinis, Trasaghis, Braulins e Peonis) par rivâ cumò a chest libri su la storie di Dalès e Oncedis e su lis fameis dal paîs.
Il libri al presente dôs ricercjis: lis notis storichis su Dalès e Oncedis metudis dongje di Pieri Stefanutti intal lavôr “L’ultima Villa di Cargna sul confin col Friuli…” e il contribût di Decio Tomat ”Dalessans e Voncedàs. Indagine demografica, statistica, genealogia e vita vissuta delle famiglie
di Alesso e Oncedis (dalle anagraû parrocchiali e comunali)”.
La ricostruzion di Stefanutti e tache des ipotesis che si rivin a fâ su la nassite dal paîs judantsi ancje cu la toponomastiche, la archeologje e ancje ce che a lassin palesâ lis tradizions popolârs.
Si fevele une vore di cemût che al è stât doprât il teritori, cemût che lis viciniis a tignivin cont dai pascui, dai boscs, des aghis; e, di li, i rapuarts cui paîs dulintor e i rapuarts cui sorestants: Vignesie, la Comunitât di Tumieç, i Savorgnans.
De fin dal Sietcent si frontin i periodis napoleonic, austriac, fint ae anession ae Italie e po, intal Nûfcent, lis dôs vueris mondiâls, cu la resistence e la ocupazion dai cosacs. I ultins tocs a rivin a tocjâ i agns ‘70 dal taramot ae ricostruzion.
La indagjin demografiche di Tomat su la popolazion, in chê che e je la sezion plui penze dal libri, e scrutine i cognons, i nons, i grups des fameis e i sorenons carateristics di Dalès e Oncedis, dulà che a son une ventine di cognons “storics” che a son in paîs bielzà dal ‘400: di ogni cognon a vegnin dadis lis notiziis che si puedin gjavâ fûr dai archivis e i arbui gjenealogjcs che a fasin capî traviers di cuâi ramaçs che a son rivâts fint in dì di vuê. La ricercje a ten cont ancje dai cognons che a son lâts a dispârî vie pai secui e chei che a son rivâts in paîs intun timp plui dongje dal nestri. La indagjin demografiche e statistiche e scrutine ancje (cun tabelis e grafics) trops nassûts, maridâts e muarts che a son stâts intal zîr di sîs secui.
Al è duncje - come che àn vût mût di rimarcâ Enos Costantini e Claudio Mattaloni, che àn presentât il libri - un lavôr une vore impuartant pe int dal paîs, ma no dome, par vê elements par capî di dulà che si ven e par vê un imprest che al judi ancje a “lei” il paîs di cumò.
("Il Diari" n. 13, setembar 2013)

da: http://blog.libero.it/centrodocalesso/12351332.html