27 settembre, Cesclans a cent'anni dalla nascita di Siro Angeli

Cent'anni fa nasceva a Cesclans Siro Angeli.  Delle manifestazioni in programma per ricordare l'anniversario, si è parlato diverse volte anche sul Blog.
Per un profilo dell'autore carnico, ecco quanto pubblicato sull'ultimo numero di "Ladins dal Friûl":

Siro Angeli a cent agns de so nassince
Il poete di Cesclans al merte di no sei dismenteât

Cesclans di Cjavaç - Ai 27 di Setembar dal 1913, juste za fa cent agns, a Cesclans di Cjavaç al nasseve Siro Angeli. Laureât ae Normâl di Pisa, al è stât scritôr e poete tra i plui grancj de Cjargne dal secul passât. Al à al so atîf plusôrs lavôrs di teatri e oparis in viers par furlan (cjargnel) e par talian.
Critic di cine e di teatri par gjornâi e rivistis, al à colaborât ae redazion de “Enciclopedia dello  spettacolo”. Dal 1953 al 1977 al è stât ae RAI come vice diretôr dal tierç program e condiretôr dai servizis di prose rasmetûts pe radio. Par furlan al à publicât lis racoltis di poesiis “L’aga dal Tajament” (Tumieç 1976, Udin 1986), “Barba Zef e jo” (Udin 1985) e “Penultimas” (Udin 1991). Al à senegjât undîs films, e tra chescj, par furlan, “Maria Zef” (1981) dulà che al à ancje interpretât une des parts principâls, juste apont chê di Barba Zef. Di lui Carli Sgorlon al à dite: “Angeli al è un scritôr dulà che il popul furlan al po pardabon spieglâsi e cjatâsi, parcè che al è un autôr che al condivît pardabon la cussience coletive dai furlans”. Mentri pal poete
tumiezin Ermis Dorigo al è stât: “ Un om di grant rigôr morâl, al pont di jessi scontrôs ancje di caratar, al veve une grande fiducie inte leterature come strument privilegjât di inricjiment spirituâl individuâl e di progrès etic e civîl di une comunitât”. Pai siei merts leteraris tal 1970 al à vût il Premi Pifanie di Tarcint.
Inte “Antologjie de Leterature Furlane” (B. Chiurlo - A. Ciceri) dal nestri poete di Cesclans si cjate scrit: Scuasit in cidin, il non di Siro Angeli al à scomençât a comparî in diviersis publicazions furlanis e ducj a pandin l’augûr che la sô no sedi une presince casuâl, par vie che cheste presince e à credenziâls di valôr intai siei viers e tal so teatri, scrits par talian, ma istès spieli fedêl di situazions e spirts travanâts di furlan. La sô trilogjie teatrâl, cjapade adun sot il titul “Gente di Carnia”, e reste une testemoneance impuartant che si la lei ore presint cun grande comozion, cundut che a sedin mudâts i timps e lis prospetivis.
Cun altri spirt al torne cumò il poete ae sô tiere, ae ricercje dal timp pierdût, scuasit a volê ricostruî lis radiis, a volêsi vuadagnâ la propie identitât a traviers la memorie. Ogni sô poesie e je come une lum impiade sot il ritrat dai siei di cjase, che no son plui: la mari, il pari, barba Agnul, i vons… E par vie che inte cjase de memorie no si po jentrâ cul cjapiel sul cjâf, chestis poesiis a son semplicis, semplicis par sielte (ma ricjis di gracie savint). A son travanadis da une maluserie dolint; a son fintremai dominadis di un ciert fatalisim, ma po il suspîr al cuiste l’aspiet insiliôs dal sintiment di colpe: il poete al à bandonât la sô tiere e al è come
se al ves tradît la mari; cumò la sô cjase e je il rein dai ragns e alte e cres la jerbe tal curtîl. Se al torne, si sint forest: nissun lu acuse, se no la vôs interiôr.
Al à disertât (la Cjargne, il paîs, la famee) e no ’nd è pâs par lui, se no tornant a scomençâ dal imprin: e velu tornâ a percori inte sô lenghe mari un pôcs dai motîfs che a jerin za jentrâts inte sô tematiche par talian. La sô anime si lave cussì inte aghe frescje de sô lenghe: ogni poesie e devente une particule di memorie che i vierç la comunion cui siei cjârs muarts e i torne a dâ la sô integrâl umanitât”. 
“In me essi da vei / dividi se j podes / îr e doman da vuei, /
qual eisal l’intares? / Ancja l’anima a muda / como la
vita, a mûr / como la vita. Jo / no lu crout, ma sigûr /
di no veila venduda / no mi sint plui, cumò”.
Cemût che si à vût iniment denant trat Siro Angeli, che al à concentrât la maiôr part de sô produzion par furlan inte racolte “L’aga dal Tajament”, al è plui distant – ma no dal sigûr mancul sensibil – di Candoni e di Leo Zanier, des tematichis soci-politichis. Intai siei viers, par esempli, la emigrazion no cuiste il caratar de inrabiade proteste, ma ben invezit chei de intime riflession, come juste apont inte poesie “Gno pari”:
“...cui lu smôf plui s’al discôr / di lavôr via pal mont, là
che di dut / al sucêt, e al conta cemût ch’a è lada / ancia
a lui ch’al è capo muradôr”.
In sumis, la lenghe mari, prodigjose sonde mnemoniche e sentimentâl, i à permetût di disbarcjâ tal cûr de sô infanzie, o sei tal cûr de Cjargne, cjantade simpri cun partecipade nostalgjie. Angeli al è un liric intens, intimist, che cul so furlan cjargnel – so parcè che une vore personalizât – al saveve vualmâ ogni plee de sô e de nestre anime: al è par chel che al ven inmò ricuardât come un dai massims poetis dal Friûl e, in particolâr, de sô Cjargne.
Simpri sul cont di Siro nus plâs ripuartâ ancje ce che al à vût scrit Zorç Faggin inte antologjie “La Poesia Friulana del Novecento” (W. Belardi – G. Faggin / Bonacci editôr 1987): “Il ‛tornâ al furlan’ intai agns ’70 nol à mancjât di dâ bogns risultâts poetics, almancul intai câs che al à obedît a une esigjence sintude, plui che a une mode dal moment.
Nol è dipendût dal sigûr de mode il recupar de fevelade native de bande di Siro Angeli. Poesiant inte fevelade dal borc dulà che al jere nassût, Siro Angeli al intint tornâ a recuperâ i leams cu la sô tiere, par tornâ a fâ propi in cualchi mût un mont e une int che a stan ae fonde de sô identitât spirituâl.
Come scuasit par ducj i cjargnei, la sô sinciretât si po definîle trasparint. Il detât poetic al è lambri e essenziâl: 
Propri culì, stentât / a alâsci su di mûr / in
mûr framièc’ un grîs / di cret e un vert di prât / cun
malta e cun clap dûr / tal cûr da Cjargna, chest / como
ch’al è, plui puar / ancia, come ch’al era, / chi al sarès il
paîs / ch’j varès scièlt par me / se ’a mi vès il Signôr /
scièlgi lassât il puest / dulà nasci”.
Siro Angeli al è muart ai 22 di Avost dal 1991.
(von zercläre)
(Ladins dal Friûl, setembar 2013)
--------------------