Lago, tra ascari e .... codârs

Riceviamo e pubblichiamo un intervento di Remo Brunetti   il quale  analizza, con la sincerità che gli è propria, il rapporto tra le forze politiche e sociali e "la questione Lago".

Spietant la prossime conference dai servizis, che a sarà si pôc su pôc ju tor dai 12 di mai, al ven  di pensâ a chei che des liendis de nestre val si son interessâts e a chei che invezit dal nestri lâc e des conseguencis dal radoplament da centrâl di Somplât si son sborâts. Di fat, ancje se 9000 personis a àn metude la lôr firme pe salvece dal lâc e pe sigurece des popolazions, i compuartaments dai sorestants a son stâts difarents di chei da plui part int. 
Cjapin par esempli i predis. Plui voltis Pierluigi Di Piazza al è stât a predicjâ che al è just batisi par un ben come il lâc che al è di ducj. E ancje i predis da foranie di Glemone nus àn invidâts a mantignî, davant da Edipower e dai siei ascars, chê dignitât che o vevin cuistade ai timps dal taramot. Ma i predis da foranie di Tumieç, invezit, sun cheste cuestion, a àn simpri tasût come il mus ta semule. Un di lôr  a disin  che si è lassât comprâ di Edipower. Ma chei altris, cemût si fasie a no clamâju codârs? 
E i conseîrs dal comun di Tumieç no son difarents: dome doi di lôr, Saro e Nonino, a àn partecipât aes sambleis di informazion, cence però jessi bogns di fâ sintî la lôr vôs tal lôr consei comunâl su lis conseguencis dal progjet Edipower. 
E i conseîrs regjonâi "cjargnei" Marsilio e Cacitti, ju veiso mai viodûts? Des tantis cjacaris che a produsin ogni dì,  ur eise scjampât alc sul lâc? Su pes sorgints in pericul? Bon, anzit mâl, unevôre mâl. Però cumò i tumiezins, sindic in teste, a cirin la solidarietât di ducj i citadins dal Friûl de Alte, par salvâ il tribunâl di Tumieç. Al è clâr che se a sierin chest tribunâl nus gjavin un servizi a ducj. Ma solidarietât par solidarietât, se i sorestants tumiezins a vulin vei ancje la nestre, la solidarietât bisugne che a imparin ancje a puartâle. A è ore di pensâ a chei che a son i intares di ducj, e no dome ai intares dai industriâi tumiezins.


                                                                Remo Brunetti