Lis paveis di Bordan a fevelin par furlan

L'ultimo numero de "La Vita Cattolica" (datato 27 aprile) presenta un interessante articolo di Erika Adami dedicata all'attività didattica in friulano che si inizia a fare alla Casa delle farfalle di Bordano.
----------
Lis paveis in lenghe

ANCJE LIS PAVEIS a fevelin par furlan. Almancul chês de cjase che ur da acet a Bordan tal plui grant complès di seris tropicâls che al è in Italie li che a son stadis ricostruidis lis forestis africane, asiatiche e amazoniche.
In chest ambient straordenari a vivin centenârs di paveis che a svolin libaris tal mieç dai visitadôrs.
Cun chê di vuidâ i piçui,ma ancje i grancj, a un rapuart plui sostignibil cul planet, la Cjase des paveis e propon cetantis ativitâts didatichis, e inmanee events, cors e seminaris, propuestis di turisim naturalistic, e partecipe a campagnis di sensibilizazion e tutele, e colabore a progjets di conservazion tai paîs in vie di svilup. E cumò, in graciis dal protocol di intese cu la Agjenzie regjonâl pe lenghe furlane, cualchidune des ativitâts e vignarà fate par furlan. Un supuart in plui e un stimul interessant, gnûf e divertent pai fruts des scuelis dal Friûl. Une gnove che e nas de «cussience di jessi inserîts suntun teritori che al à peculiaritâts specifichis tant che la lenghe furlane », e spieghe Rossella Crescente, responsabile de sezion didatiche de Cjase des paveis di Bordan.
La lenghe furlane e je jentrade cussì in maniere ative e sinergjiche te ativitât promozionâl, informative e didatiche de Cjase des paveis. Il catalic de ufierte didatiche pal an s c o l a s t i c 2015/2016 al propon la pussibilitât di sielzi tra une escursion e trê  laboratoris specifics fats in lenghe furlane e compagnâts di materiâi fats di pueste e distribuîts ai partecipants.
In particolâr, a saran fatis ancje par furlan la visite dilunc lis rivis dal lâc di Cjavaç (par students de scuele elementâr fin aes primis classis des superiôrs) e il laboratori animât pai frutins des scuelutis e des classis prime e seconde de scuele elementâr «La vite straordenarie di Rosa e Emilio », che al conte cemût che e nas, e cres e e vîf une pavee doprant marionetis fatis a man.
In lenghe ancje il laboratori «Vuê o soi une pavee» pai fruts des classis tierce, cuarte e cuinte de scuele elementâr che a provaran a vivi tant che un inset (a saran vistûts di ruie, crisalide, a metaran alis, tant che te foto parsore, cjapiei cun pomis e flôrs) e «Un planet di paveis. Il zîr dal mont intune ore o pôc di plui» contât ai fruts de tierce classe de scuele elementâr fin ai students des superiôrs
cul jutori di un video e di une visite ae mostre «4 vitis, mil storiis» sul mont des paveis.
Ducj e trê i laboratoris a laran indevant cu la visite aes seris par cjalâ di dongje i lôr colorâts abitants. Ancje chestis ativitâts a saran tignudis dal staff de cooperative «Paveis tal cjâf»che e gjestìs la Cjase di Bordan.
Par informazions e prenotazions si puedin clamâ i numars 0432/1636175 – 344.2345406 o scrivi une mail ae direzion: didattica@bordanofarfalle.it
Cul prossim an, e zonte Crescente, il furlan al jentrarà ancje tal sît de Cjase des paveis (www.bordanofarfalle.it), dongje di talian, inglês e todesc, e al compagnarà fruts e grancj su la cartelonisticheinterne de struture.
La Cjase, logade ae jentrade di Bordan, in vie Canada 5, e je vierte fin ai 31 di Otubar dal lunis al vinars des 9 di matine aes 6 sot sere (fin 5, tal mês di Otubar); la sabide, la domenie e tai dîs di fieste des 9 di matine aes 7 di sere.
                                    ERIKA ADAMI