Dopo Sauris, Verzegnis. E sul Lago di Cavazzo c'è qualche brivido... (XVI)

Il numero di luglio della rivista "in marilenghe" "Ladins dal Friûl" dedica un articolo alle tematiche legate allo sfangamento di Verzegnis ed alle possibili conseguenze per il Lago di Cavazzo/Tre Comuni:

Lât di Cjavaç: no a un altri savoltament ambientâl!

Ladins dal Friûl, luj 2014, p. 3

Cjavaç - Daspò ce che al è sucedût tal lât di Sauris/Zahre, al è daûr a rivâ un altri savoltament
ambientâl pal bacin de Ambieste, o sei pal lât artificiâl di Verzegnis creât come serbatori al servizi
de centrâl idroeletiche Edipower di Somblât. Al è in fats in program di puartâ vie la velme di
sediment che e je presint tal bacin.
 Il progjet di Edipower in fats al met a riscjio, oltri che il bacin de Ambieste, ancje il lât di Cjavaç,
dulà che e podarès rivâ jù une cuantitât no cuantificade di paltan. Al è chest darest un dai aspiet che
plui a dan preocupazion pal Comitât di tutele des aghis dal alt bacin dal Taiament.
 Cun di fat il progjet al proviôt che, intant dai lavôrs di sfangament, la centrâl idroeletriche di
Somblât, che e ven alimentade propite de aghe dal lât di Verzegnis, e vadi dilunc a funzionâ. Il
probleme al è che la prese che e puarte la aghe aes turbinis si cjate alì che vignarà instalade la
draghe che e recupere il paltan in sospension. Al è evident che une part di chel paltan al larà a finîle,
daspò jessi passât pe centrâl sot vie, tal lât di Cjavaç.
 Franceschin Barazut, puartevôs dal Comitât di tutele des aghis di mont, in rivuart al à lis ideis
claris. “A proviodi chest “dam”, dal rest, a son chei di Edipower, ma a sostegnin che se si ferme la
centrâl si sbasse masse il nivel dal lât di Cjavaç. Evidentementri a son in malefede. Il lât, in fats, di
cuant che al esist al è stât simpri alimentât des aghis dal riul Schisaze. In prionte simpri secont
Edipower l’efiet negatîf al è plui aparint che di sostance. Ma o savìn che il lât al à bielzà cetant paltan
sul so font. Sun chest cont a esistin studis che a disin che tra 110 agns nol esistarà plui, al sarà
dome un ricuart, co velme e paltan lu varà jemplât dal dut”.
 Juste par chestis resons il Comitât al è cetant critic: “La operazion e covente dome par no pierdi
vuadagn. Mancul energjie si prodûs mancul bêçs si cjapin”. Di achì e diven la richieste che intant
des oparis di sfangament dal bacin de Ambieste lis turbinis de centrâl di Somblât a vegnin fermadis:
“Tal lât nol po lâ a finîle altri paltan”.
 Altre richieste dal Comitât ae Zonte regjonâl e je chê di “meti in vore il parê de Cuarte comission
consiliâr che scrutinant il plan di tutele des aghis, e à dite che, insiemit ae realizazion di une
derivazion dal lât pai ûs di irigazion des campagnis dal Friûl di Mieç de bande dal Consorzi Ledre
Taiament, si vebi di proviodi ae costruzion di une deviazion dal scaric des aghis de centrâl di
Somblât, in mût di puartâlis fûr in maniere direte tal Taiament a traviers une condote di pueste”.
“Sun chest pont – al à dite inmò Barazut – o sin rindûts a no molâ. O pensi che une Regjon civîl e
scugne impegnâsi inte tutele e inte valorizazion dal propi patrimoni ambientâl. E po chel di Cjavaç al  è l’unic lât naturâl di une cierte dimension che nus è restât!”. (mdp)