Une esperience pal bon ûs dal web

di Martina Picco 

Un dai laboratoris de zornade "Marilenghe & Mariscuele" di chest an (Codroip, ai 8 di Avrîl) al trate un teme di grande atualitât, chel dal rapuart tra zovins e web. Spes no si rindìn cont, ma te sachete o puartìn il mont… al somee che nol pesi tant, ma cjalant miôr o podìn acuarzisi che chel piçul barconut che o vin in sachete al tapone un grum di insidiis, massime pai plui zovins. Amîs o contats fals, fotografiis o video comprometents, cyberbulisim, "sexting", "selfie" pericolôs, "fishing", conformitât a ategjaments di pôc rispiet: dome cualchidun dai pericui dulà che si va a scuintrâsi. Fantats e fruts (i dâts a mostrin che di an in an si sbasse simpri di plui la etât medie dal prin smartphone) ancje se nassûts digjitâi, cun dificoltât a rivin a capî e a gjestî situazions di pericul. Par chest al è fondamentâl pandi za dai prins agns di scuele la culture di une gjestion atente dai profîi e des identitâts web. Une des regulis plui impuartantis e je chê di imparâ a tratâ lis impostazions de privacy, presintis aromai su dutis lis plateformis, che a permetin di condividi i contignûts dome cu lis personis e i profîi che a son tra i contats o cui amîs. Impensìnsi che ogni contignût, une volte publicât, al podarà jessi gjavât dome di une piçule part dal web: se o publichin une imagjin e o decidìn di gjavâle un moment dopo, o podìn, dut câs, riscjâ che cualchidun dai nestris contats la viodi, la discjami sui siei dispositîfs e la difondi su canâi difarents.
Un probleme di cumò al è il cyberbulisim, une forme plui evolude dal bulisim "offline". Un program sempliç par justâ une fotografie, une foto finide tes mans sbaliadis, une ofese spandude sui canâi plui frecuentâts al pues creâ situazions dolorosis e dificilis di fâ front par fantats ancjemò zovins e flevars. Ogni dì in cronache fantats e fantatis suicidis par colpe di foto o video robâts e spandûts online, o pûr par vie di ofesis slargjadis come il vueli in gracie di un clic. Un altri riscli al è chel dai "fishing" e des trufis dal cumierç eletronic. Comprâ sul web al è pratic e svelt, ma se no si sta atents si riscje di fâ transizions su sîts no autorizâts. Cemût evitâ dut chest? Pal sigûr o podìn provâ a trasmeti la culture dal rispiet di un par chel altri ancje online; o vin di imparâ a rindi il web un puest plui sigûr, segnalant contignûts ofensîfs, gjavant vie imagjinis o post che a podaressin creâ fraintindiments e imparant a gjestî miôr i imprescj pe sigurece che i social a dan. Sul web a son i grancj che a àn di imparâ dai zovins come movisi, ma al reste compit dai grancj insegnâ ai zovins come che si sta tal mont… "online" e "offline".