Somplago, Edipower ci ripensa. Per "Ladins dal Friûl" è un autentico "colp di sene"

L'ultimo numero di "Ladins dal Friûl" (il n. 5 dal mês di maj) dedica un ampio spazio alle prospettive del Lago dopo il Comunicato di Edipower che segnalava il "congelamento" del progetto di raddoppio della centrale di Somplago.

Lât di Cjavaç: Edipower  (par cumò) e rinuncie  ai siei progjets 
Colp di sene denant des votazions regjonâls  suntune iniziative  contestade


Dalès – Denant des votazions al è rivât il colp di sene:
almancul fintremai al 2015 la Edipower e tignarà tal
cassetin il so progjet sul cont dal dopleament de centrâl
idroeletriche di Somblât che tant al à fat dibati,
mobilitant citadins e comitâts ambientaliscj di difese
dal teritori e fasint burî fûr periziis pro e cuintri di
cheste iniziative. Po ben Edipower vinars 5 di Avrîl e à
comunicât che il so plan industriâl pal 2013/2015 nol
proviôt chest intervent. Al è curiôs che chest comunicât
al sedi rivât juste cualchi zornade denant dal incuintri
organizât a Dalès dal Comitât pe difese dal lât cui cuatri
candidâts ae presidence de Regjon, che al veve come
teme juste apont il progjet di potenziament dal implant
di Somblât cul sisteme dal pompâ la aghe di gnot tal lât
di Verzegnas e il so scaric di vie pal dì in chel di Cjavaç,
cun evidents dams ambientâi une vore pesants.
     Sodisfant naturalmentri Franceschin Barazzutti,
animadôr dal Comitât pe tutele des aghis dal bacin di
mont dal Taiament, che, se di une bande nol è dal dut
sorprendût de decision di Edipower, di chê altre al
sigure che la atenzion e larà dilunc a restâ alte: “Nus fâs
cetant plasê, ma no sbassin la vuaite – al dîs -. Jo o
pensi chest: a àn presentât il progjet tal 2009, pal 2010
al veve di jessi dut finît; o sin rivâts fint al 2013, no je
dome la crisi che e je vignude a slaifâ chest progjet, ma
ancje la ferbinte oposizion che o vin metude in vore.
Merit nestri e de nestre int, che no jere a fat disponude
a fâsi imponi cheste gnove prepotence! Cheste decision
la nasavi tal aiar, tignint di voli lis pagjinis economichis
e i articui economics dai grancj gjornâi: propite par vie
di cheste crisi al vignive sotliniât l’aspiet che e je calade
une vore la domande di energjie. In cheste situazion
nol à sens gran fâ un investiment cussì impuartant
riscjant di no rivâ a otignî chei vantaçs che si veve
metût in preventîf. Inmò, intai ultins agns e je cressude
un grum la produzion di energjie dal soreli e chê
eoliche. Si sa che lis centrâls idroeletrichis a cuvierzin
soredut lis richiestis di ponte di energjie. Chest al sucêt
naturalmentri plui di dì cuant che a funzionin lis
fabrichis e i servizis. Ma di vie pal dì e devente di ponte
ancje la produzion di energjie dal soreli, tant che chescj
doi sistemis a son in evident concorince. Tant al è vêr
che i Emirâts de Arabie a son daûr a fâ un investiment
di 109 miliarts di dolars tal fotovoltaic e par espuartâ
energjie. Un altri progjet di cheste sorte, par un
investiment di 405 miliarts di euros e je daûr a metilu
in vore la Union Europeane. Cun chestis prospetivis il
progjet di Edipower pal lât di Cjavaç al è daûr a deventâ
superât e i dams ambientâi che al produsarès no
saressin in nissune maniere justificâts”.
     Simpri sul cont de centrâl di Somblât, al reste il
probleme dal scaric de centrâl diretementri tal lât, che
al è daûr a produsi mudaments negatîf sul stât di
conservazion di chel che al è il plui grant lât naturâl de
nestre regjon. Il lât, si lu viôt in maniere evident, al è in
grande soference comprometint ancje i progjets di
svilup turistic. Si trate di cjatâ une soluzion par puartâ
il scaric de centrâl a val dal lât, tal cjanâl che cumò al
discjame il sore plui di aghe viers Taiament. Chest al
permetarès di tornâ a creâ chel ecuilibri naturâl
comprometût, cence tancj rivuarts, dai progjets Sade-
Enel intai agns cincuante. (mateu di prun)
____________________________________________________________________________
______________________________________________________________________________