Feminas: ce vitas!

8 marzo, con un gesto di rispetto per le donne d'oggi .... e la riproposta di un testo di Zuan Cucchiaro (pubblicato sul libro di Alesso) dedicato alle "Vitas di feminas"

“Vitas” di feminas intai lavôrs di ogni dì

Se, vuê como vuê, i rivassin a meti in rìa, a la pari, la cuantitât (no la cualitât) dai lavôrs che la int
di Delès a metèva adùn, stagjon dopo stagjon, al risultarès che a na era recuia, a na si fi niva un lavôr che an saltava fûr subìt un âti.
Jevâ a buinora prin dal cricâ dal dì, lâ intal cjôt a dâ il prin fen e jodi che a si disveàva ancja il purcìt (e alora contentâ ancja chel, sedenò a na ti lassava in pâs), tirâ il fl ât cualchi moment e dopo beverâ, dâ il fen, molgi e lâ a puartâ il lat, scovâ il cjôt e puartâ fûr il ledan inta cort.... dut prin di meti sora il cafè, tacâ a fâ cuei il zûf, sveâ i fruts, dàur di mangjâ, menâju intal asìlo o mandâju a scuela, comedâ il jet, scovâ la cjasa, dâ da mangjâ as gjalinas … e preparâsi par tacâ a lavorâ!
Al era dopo che (a si fâs par mût di dî) a tacava la part pui impuartant. A seconda da stagjon, se al era
inmò unvièr a si veva di lâ a fa un cos di lens o un fas di stranc, inviantsi su par Vornêt o di chê banda di Somp Forcja: un tic besveltas, parcè che bisugnava tornâ a cjasa in timp par meti sora la polenta e alc par dongja, lavâ la massarìa e inviâsi a tacâ il lavôr inta stala, cui nemâi di regolâ, beverâju, molgi... e lâ indevant cussì, ogni zornada, magari sintint a bruntulâ il “paron” parcè che a na era pronta la aga cjalda par fâ la barba o i brigons a na erin stirats avonda indret...
Cuant che la stagjon a lava indevant, al tacava il calvari da campagna: fa las gârs, samenâ las patatas,
il sorc, i fasûi, la cèzara.... La campagna a na dava un moment di sosta, al era simpri tant ce fâ, a na si
fi niva mai. Via pa stât a vevin di lâ a fen ogni dì, e puartâ sul cjâf il fas (un o doi ogni zornada) cul fen seât su pa mont (chel tal plan a si lu puartava a cjasa cu la barela).
Dopo vê regolât la campagna, via pa biela stagjon, al rivava il moment di riguei il risultât di dutas chês faturas, ma no simpri il contegnût al pajava il sudôr: dopo forcjât e tornât a forcjâ, sclofât, parât il sorc, al era miôr no cjalâ il grum da sostanza metuda dongja, tant al era minût...
Chesta a era la vita das nestas pôras maris, agnas e nônas.... Una das pocjas sodisfazions a la vevin a buinora o das desseras, cuant che a si cjatavin inta latarìa e – conta tu las tôs liendas e jo las mês - al vegniva fûr un sunsûr che al faseva lâ in bestia il casaro.
Unìn di consolazion al era ancja cuant che a si lava a tirâ il lat, e a si vendeva ancja cualchi litro e intal casselìn al restava cualchi carantàn dopo di vê pajât las spesas da latarìa.
Ma intal mês di avrîl, spezia par chês fameas ch’a vevin scjarsitât di fen, a si lava su intai stâlis, dulà
che la erba a era cressuda. La pui part da int a veva il lûc su da Forcja, ma and’era ancja che a lavin sul Cuel dal Mus, in Cjampèas, in Culcîs, Val, Tesseit e atis stâlis pui pizzui.
A si lava a passon cun vacjas, piôras e cjâras, a si faseva il formadi, spongja, scueta , e dapît il lat
di pìgna, e dut al judava. Ma tant che chês feminas a menavin a passon las bestias, i oms a ingrumavin lens e i pui specialiscj a cueievin las còtas di cjarvon.
A ur tocjava ancjimò as feminas di puartâ dut su pa schena; par furtuna che in cualchi val a era in funzion una cuarda a sbalz o una teleferica.
I oms, dopo, a vevin il passatimp da cjazza e da pescja (cussì das desseras, in Plaza o intas ostarias,
a era in vigôr la classifi ca di cui che a las contava pui grossas!).
Par furtuna che l’Onipotent al veva penzât di fâ da belanza e inventât, lavìa dal Riu da Côt e ju da Cuesta, un lûc dulà podê pojâ la schena. Par tant timp al era un mût di fâ riservât nomo ai zovins: las zovinas a àn scognût spietâ che il mont a si svierges par podê lâ liberamenti a cjapâ il soreli su la riva dal Lâc o intal Palâr!

(Da "Alesso e Oncedis: l'ambiente, il paese, al vita", Comune di Trasaghis - Centro di Documentazione, 2014)